使用吴语做正式的学术讲座是怎样的体验？刘震:吴语上海话守望者 |吴语公众号

各位大家好，我是刘震，来自于复旦大学印度语研究中心。我主要从事嗰是梵文写本研究工作。我原来呢是蹲嘞银行里向工作嗰，做了6年生活，后来发觉箇份工作并弗是自家所欢喜搭吇适应嗰，所以讲我就到德国留学去了，想调调环境。我蹲嘞德国所学嗰专业呢，是印度学专业。箇门专业呢，我学了德文、梵文、巴利文搭吇藏文介许多语言。箇让我觉着呢，语言多样性嗰重要，同时呢，也看到了像德国、印度箇眼国家渠拉是哪能介对待自家嗰母语嗰，接下来呢我就向大家讲讲阿拉自家母语嗰故事。

我呢，蹲嘞德国总共读了嗰7年书，经历了欧洲一体化搭吇全球化嗰过程，也感到呢德语啊越来越走下坡路了，原先阿拉写毕业论文嗰辰光呢，是规定要用德文来写嗰，后来呢就变成功德语、英语侪可以嗰。再后来，像现在交交关关德国学生呢，渠拉主动放弃自家嗰母语德语，而改用英语来写论文。箇就让阿拉觉着，原来费了九牛二虎之力（这非吴语词，吴语常用五筋狠六筋）学下来嗰德文呢 ，现在变成了无用功。

箇能样子嗰情况也发生嘞嗨我嗰母语上海闲话上头，蹲嘞德国我曾经碰着一个来自南京嗰女同学，她曾经搭我讲：“侬讲嗰上海闲话弗像上海闲话”，其实呢弗是我嗰上海闲话弗正宗，而是渠所接触到嗰上海同学 ，渠拉讲嗰上海闲话弗正宗。

箇末现在嗰年轻人啊讲上海闲话来，主谓宾箇眼实词侪是用普通言话来讲嗰，而只有虚词部分呢用上海闲话来意思意思。另外，还有桩事体，我蹲嘞德国搭屋里向人打电话，发觉呢渠拉有交关词汇已经弗晓得哪能介用上海闲话来表达了，箇就让我觉着呢，有必要好好去重新构拟一下自家上海闲话了。箇末我就用课堂当中学着嗰语文学方法呢，来构拟上海话，先确定几个完全可以吃准嗰发音交词汇呢，随后用呢箇几个词来推导其他嗰词汇。箇末嗰能介几年下来呢，慢慢叫慢慢叫，我嗰上海话就老结棍了。

看了德国文化一眼眼畀吞噬，看了沪语呢一眼眼畀普通闲话所取代，箇让我觉着，随着全球化嗰进程，各地嗰文化呢，甚至于人类嗰文明会得逐渐消亡。而母语呢是首当其冲嗰，箇让我萌生了要推广母语嗰想法。毕业之后呢，我就回到国内蹲嘞高校里向工作。其实啊，我嘞德国留学嗰辰光，曾经一劲利用放假回国嗰机会呢，蹲嘞复旦开设梵文课。后来到了2012年，我蹲嘞自家办公室里向开小班课，箇末来听课嗰学生子有得本科生、有得研究生，我发觉渠拉侪听得懂上海闲话，箇末我讲阿拉用沪语来授课伐，虽然讲呢渠拉弗一定好用沪语搭我交流，但是呢渠拉可以接受，箇就是从双向嗰交流变成功单向嗰传输了。箇可以呢去纠正一种现在流行嗰观点：就是讲啥呢，普通闲话只适合于严肃正式嗰场合，而方言只好用来表达家长里短、鸡毛蒜皮嗰事体。箇末通过箇趟经历呢，从此以后呢，只要是小班授课，只要受众能够听得懂上海闲话，我就坚持用母语来授课了。

我嗰交关同事呢还有交关同行呢，对此也抱有同样嗰看法，所以讲呢，阿拉一淘蹲嘞嗨鹿鸣书店，从旧年（2015年）开始， 组织了一个印度学与印度研究嗰系列讲座，并且阿拉建议参与者尽量使用母语来做讲座。目前为止呢，阿拉所使用过嗰母语有得沪语、粤语、德语，另外呢阿拉还使用过普通闲话。箇讲座还配有PPT，虽然讲弗一定听得懂箇语言，但是也可以了解讲座嗰内容，讲座有排辰光呢会得坐满嗰，有排辰光只有三三两两嗰人，不过覅紧，只要有人来听呢阿拉就照常开讲。箇末我也希望呢，就是讲，来听嗰人弗再关注于讲座嗰语言本身，而着重对讲座嗰内容有兴趣，箇末阿拉讲座嗰目的也就达到了。

我伲汉语呢，渠弗是拼音字母文字，所以讲要保存一种中国嗰语言必须要有人嘞嗨嘴巴里向讲。阿拉现在中国交关语言呢，已经丧失了自我增殖搭吇代谢功能，箇就好比海里向嗰一棵棵珊瑚，渠拉呢弗再生长新嗰珊瑚丛了。

所以讲我也想呼吁大家，尽量多使用母语，尽量呢让箇眼珊瑚蹲嘞海底下头多蹲一段辰光，尽量晏一眼畀打捞起来摆嘞玻璃橱窗里向。

阿拉舌头尖尖上头呢，弗仅仅有吃进去嗰各地美食，外加还有输出来嗰，输出来嗰就是阿拉嗰母语，只有大家各自认真嗰热爱帮保护自家嗰母语，才可以拼成一个完整嗰舌尖上嗰中国。谢谢大家。

（感谢吴语君的小助手Charles进行了吴语文的翻译、转写和整理。）